Latest News
الاثنين، 8 مايو، 2017

الشاعر ياسر بلتاجى فى حوار جرئ مع الصحفية هبه السعدنى حول مشواره الفنى .




حوار صحفى / هبه السعدنى
اليوم الموافق ٢٥ / ٤ نلتقى بشاعر الاسكندريه الشاعر ياسر بلتاجى وفى البدايه احب ارحب به وبأعماله التى سنقاشها اليوم فى حوار جرئ لأول مره عى هبه السعدنى .
اهلا بيك يافنان
ياسر / اهلا بيكى استاذة هبه 
س/ نحب فى البداية نعرف مين هو شاعر الاسكندرية؟؟
ج / أنا أسمى ياسر يحيي صابر محمد بلتاجى 
و أشتهرت من بداية ظهورى بأسم ياسر بلتاجى ومن الاسكندريه .
س / ممكن تحكلنا عن بداياتك الفنية وكيفية اكتشافك لموهبتك الفنيه كالشعر؟؟
ج / كانت بداية حبى للشعر و اختيارى انى اكون شاعر مش من صنع الصدفه و لا اقدر اقول انى لقيت نفسي شاعر و لكن من و انا لسه ابن 3 سنين كنت بحب الفن جدا و بكل انواعه سواء الكتابه او الغناء او التمثيل او الموسيقى و كنت أعشق الفن و أهله
س / مين اكتر شخص فى حياتك شجعك واكتشف معاك موهبتك ودعمك من قلبه بجد ؟؟
ج / اللى خلانى اخد الشعر طريق ليا فى رحلتى الفنيه هو والدى المهندس يحيي صابر بلتاجى لأنه قارئ بدرجة امتياز و له مكتبه خاصه به فتحت عينى عليها و على اهتمامه انى اقرأ او انه يسمعنى كتير من اى كتاب يقراه و بعدين بدأت اكتب و ما قولتش لوالدى انى بكتب كنت محرج منه او عقلى كان بيقولى بقى انت يا ياسر ممكن تقول لأبوك انا شاعر و انت تيجى ايه جنب اللى بيقرالهم او بيسمعك شعرهم و لكن بلغت أمى و كنت بقولها اشعارى لحد ما فى يوم قولتله و لكن حصلت حاجه مكنتش اتوقعها .. لقيت والدى فرحان جدا بيا و بدأ يشجعنى و يسأل بنفسه عن مواعيد الندوات و بدأت أدخل الوسط الثقافى عن طريق قصور الثقافه ..
س / متى كانت بدايتك الفعليه كشاعر؟؟؟
ج / تقدرى تقولى ان البدايه الفعليه و الحقيقيه ليا كشاعر بدأت من وجهة نظرى من الصف الثانى الثانوى كنت بدأت استوعب مجتمعى و مشاكله و اقدر اكتب عنه بشكل سليم و من خلال نظره واعيه للأمور و للحياه اللى بعيشها
س / وهل كان فى حد بيدعمك من مدرسينك فى المرحله الثانوية ؟؟
ج / طبعا .. بدأ مشوارى على أيد الأستاذه العظيمه أ/ سماح صبحى .
أستاذه علم النفس و الفلسفه فى المرحله الثانويه و قدمتنى للطلبه و لزملائى و وقفت جنبى
س / هل ثورة ٢٥ يناير اثرت على موهبتك كشاعر ؟؟
ج / طبعا اكيد كنت انا دفعة ثوره 25 يناير الثوره العظيمه و طبعت مجلد ليا و لزملائى فى بعض الاشعار و لكن مش ديوان هو بس مجرد اشعار مجمعه فى ورق و جلاد حاجه كده على قد ما قسم زى ما بنقول بالبلدي .
س / متى كانت نقطة التحول فى حياة الشاعر ياسر بلتاجى؟؟
ج / عندما قابلت عملاق الكتابه و شيخ شعراء الاسكندريه عم / جابر سلطان .
و هنا تحول ياسر بلتاجى الشاعر المبتدأ لشاعر له وزنه و قيمته و مذاق خاص فى الكتابه لأن عم جابر سلطان وقتها كان بالنسبه ليا كنز و نقطة تحول كبيره اوى فى طريقى الفنى لأن هو اللى صحح مفاهيم كتير عندى عن الكتابه و فنها و عن الشعر و الشعراء كان و مازال بالنسبه ليا مدرسه كامله الاركان و ربنا يبارك فى عمره
س / هل كان هناك لقاءات بك تليفزيونيا او اذاعيا؟؟
ج / بالفعل حدث و تقدمت لتليفزيون الأسكندريه و أتذكر بعد أول لقاء ليا فى قناة الأسكندريه كنت اول مره أسمع والدى بيقولى ( أزيك يا شاعر ) و كأنه كان مخبيها جواه لحد ما أثبت له أنى حققت اول احلامى و بدأت مشوارى صح .
سجلت فى تليفزيون الأسكندريه حوالى 72 حلقه و 3 حلقات للراديو .
س / احكلنا بقا عن مشوارك الجامعى وازاى الجمعه كانت نقطة انطلاق بالنسبه لك ؟؟
ج / من اول أسبوع فى الجامعه لقيت مسابقه شعر أشتركت من غير ما أعرف شروطها او ميعادها و ربنا أكرمنى و أخدت المركز الأول فى شعر العاميه و من يومها لم اتنازل عن المركز الأول لحد ما أتخرجت فى 2015 و بقيت محامى لابس بدله و شنطه جلد قد الدنيا على رأى جدى الله يرحمه .
س / مالعلاقه التى تربطك بالفنان على حسين ؟؟
علاقتى بالمطرب الكبير / على حسين
بدأت من أحداث الثوره و كانت البدايه من قبل كده و لكن من طرف واحد اللى هو انا .. كنت بقعد اشوف الكليبات بتاعته و ادور عليه و احب اعرف اخباره لأنه فنان متميز و صاحب مبدأ و فن و أبداع تقدرى تقولى كده فنان مصري أصيل من طمى النيل الأسوانى الطين الأسمر أبو قلب أبيض و بدأت أبحث عنه لحد ما فى يوم لقيت الحساب الخاص به على الفيس بوك و راسلته و كلمنى المنتج الخاص به
المهندس المحترم / خالد جمال .
له فى حياتى كتير حتى الأن و هو أخ كبير بالنسبه ليا
عملنا أغنيه حاسس بالخطر .. عقب أحداث الثوره و كانت أول عمل غنائى ليا و من يومها و انا و على حسين دم واحد و اكتر من الأخوات .
س / متى بدأت رحلتك مع وزارة الشباب والرياضة ؟؟
ج / بدأت رحلتى مع وزارة الشباب و الرياضه من 2012 و قدمت حفلات تابعه للوزاره فى بورسعيد و الأسكندريه و السويس و سيناء و شرم الشيخ و لكن فى الفتره الأخيره انشغلت جدا فى حياتى الفنيه و تصوير الكليبات و اعتذرت عن المشاركه .
س / أين الحياة العاطفية فى حياة الشاعر ياسر بلتاجى وماهو المعنى الحقيقى لكلمة الحب فى قاموسك وبناءا على طلبات صديقات صفحتك احب اسئل هل شاعرنا الرائع الذى يتميز بالحس الراقى والشعور الرقيق فى كلماته هل انت مرتبط ؟؟
ج / الحب فى حياتى هو حب لكل الناس سواء أهلى او اصدقائى او فريق العمل بتاعى او الناس اللى موجودين فى الشارع انا بحب كل الناس دون تفرقه او محاباه من القلب للقلب ببساطه .
موضوع الأرتباط ده كان مره واحده و أنتهى الموضوع و لكن ساب ليا وجع كبير لأن مدة الارتباط كانت 5 سنين .. و سيبنا بعض و الاحترام موجود .. لأ مش بفكر فى الوقت الحالى فى الأرتباط لأن الناس و حياتهم محتاجين كل ثانيه فى وقتى علشان اتكلم عنهم و انا كل اهتمامى بمشروعى الفنى و ان شاء الله لو لقيت بنوته مصريه جميله كده و جدعه تبقى كتفى و صاحبى و حبيبتى و تعرف انى ليا معجبين بنات و تفهم النقطه دى اوعدك ارتبط على طول .
س/ من هم فريق عملك الذين تثق بهم وفى آرائهم ؟؟
ج / فريق العمل بتاعى يتلخص فى أسمين بدأت معاهم و مش هغيرهم خالص لحد نهاية المشوار
لأنهم أخواتى بجد و بيخافوا عليا و بيختاروا معايا بيفكروا ياسر هيكون فين الفتره اللى جايه و هيقدم ايه و دول بقى حبيبي و أخويا و ضهرى المخرج العبقرى / أحمد وحيد .
و ده حدوته لواحده وقف جنبى كتير و ساعدنى كتير و استحملنى كتير و كان معايا على المره قبل الحلوه .. أشتغلنا مع بعض كليب وجع شعب إلى السيد رئيس الجمهور
و كليب أوعى تكسر قلب بنت و اللى نجح نجاح ساحق على السوشيال ميديا و كليب إنسان فى الشارع و المقرر طرحه فى نهايه هذا العام .
حبيبي بقى و روحى و أخويا اللى كان نفسي يبقى عندى اخ زيه و ربنا رزقنى به
الموزع و المهندس / حسام سعيد .
ده قلبى و كان وش الخير عليا و القصائد اللى أشتغلناها مع بعض و الشغل اللى جاى كله من توزيع و هندسه و ماستر حسام سعيد .
وقف جنبى و تعب كتير علشان نطلع شغل متميز فى اسرع وقت و ساعدنى فى اختياراتى و اتمنى اكون دايما عند حسن ظنهم .
س / حدثنا عن كيفية انضمامك لشركة الانتاج بيراميديا ريتشارد الحاج ؟؟
ج / انضمامى لشركة بيراميديا ريتشارد الحاج .. أنا بعتبرها خطوه كبيره جدا فى مشوارى الفنى و أضافه ليا و التعاون مع منتج بحجم و قيمه المنتج ريتشارد الحاج .. شرف كبير ليا لأنه مش مجرد منتج بيشتغل فى السوق لأ هو فنان راقى من طراز المبدعين و أهل الفن الحقيقى و أتمنى اكون عند حسن ظنه دائما و اكون وش الخير عليه و انا أثق به ثقه عمياء و مطمن معاه .
أن شاء الله الألبوم الفتره اللى جايه هيكون من خلال بيراميديا ريتشارد الحاج .. و الحمد لله أنتهيت من التسجيل و الألبوم من توزيع و هندسه و ماستر م/ حسام سعيد .
و أخراج الكليبات أ/ أحمد وحيد .
و ان شاء الله الألبوم يعجب الناس و هيكون متنوع ما بين الرومانسيه و الدراما و القضايا و السياسه و الحلم .
س / هل هناك اعمال اخرى تستعد لها الفترة القادمه؟؟
ج / طبعا هناكأعمال غنائيه قادمهان شاء الله
فى 3 أعمال بتجمعنى مع المطرب الأسوانى المحبوب / عبد الواحد البنا .. بعنوان غير أى بنت .. و فى أغنيه مع المطرب الشاب / تيام .. قريبا فى الالبوم بتاعه الجديد
و مفاجأه مش هقول عليها دلوقتى هتعرفيها بعد العيد .
فى نهاية لقاءنا وحوارنا الممتع والشيق والصحفى تحب تضيف اى حاجه للحوار؟
ج / أنا حابب أشكر ناس مهمين فى حياتى و معايا دايما
أخويا الممثل المبدع / محمد وحيد
الانسانه الجميله / هاجر
المطرب المتميز و الفنان / محمد صلاح
دايما بيدعمنى و بيشجعنى و بفتحلى ابواب كتير
الأنسانه الخلوقه و الجميله / جيهان مجدى
وش الخير عليا و أختى الغاليه جدا جدا
و بشكر كل أصحابى و اللى بحب اقول عليهم أهلى و عائلتى الكبيره أصدقائى على مواقع التواصل بجد شكرا من قلبى و شكرا انكم فى حياتى و يارب دايما مع بعض و انا موجود بيكم خليكم جنبى.
هبه / فى النهاية بشكرك جدا على تلك اللقاء الصحفى الشيق وان شاء الله قريبا نحتفل بمؤتمر صحفى بعد نهايتك من تصوير اخر كليباتك
الشاعر ياسر بلتاجى/ فى النهايه .. أنا عايز اوجهلك انتى يا هبه رساله شكر و حب و امتنان لوقوفك جنبى و دعمى بشكل مستمر و انك من اوائل الصحفيين اللى كتبوا عن وجع شعب و ما خوفتيش و اتمنى لك النجاح دايما و التألق و ان شاء الله يشرفنى مقابلتك مره تانيه بعد صدور الألبوم و اتشرفت بيكى جدا جدا و يارب دايما اكون عند حسن ظنك .
هبه / اشكرك والى اللقاء فى حوار صحفى جديد
  • Blogger Comments
  • Facebook Comments

0 التعليقات:

إرسال تعليق

Item Reviewed: الشاعر ياسر بلتاجى فى حوار جرئ مع الصحفية هبه السعدنى حول مشواره الفنى . Rating: 5 Reviewed By: nona elsayed