Latest News
الجمعة، 23 يونيو، 2017

الشهيد ناجي العلي

\

الشاعر حسين الديب ،،،
قتلونا يا ناجي العلي
قالو القضية مش لنا
و اﻷرض دي مش أرضنا
و القدس دا مش ملكنا
و جدودي إللي ماتو زمان هنا
مافيهمش ولا واحد ولي
خسرانة يا إبن العلي
،،،،،،،،،،،
خسرانة بيعتك من زمن
و موتنا كان من غير تمن
و الوطن،،أصبح عفن
و ريحته في وشوشنا بتنطلي
سامحني يا ناجي العلي
،،،،،،،،،،
يعني رحت بالرخيص
و القدس مابقاش شيئ نفيس
و الشهيد مش عريس
دا الشهيد ظلمو الزمن
بموته نوره بينطفي
طب يا شمسه ليه ليه بترحلي
ما دام صاحبنا مش ولي
ولو إسمه كان ناجي العلي
،،،،،،،،،،،
يا شمس ليه ليه بتطلعي
على أرض شربانه دما
عيشي ف سماكي و إركعي
لكل إللي ماتو زمان هنا
و القدس لو مش أرضنا
يبقى يا شمس إرحلي
و ما تسأليش ،،،،عن قبر صاحبنا الولي
و ما تسأليش أجيال جديدة
عن الشهيد ناجي العلي
،،،،،،،،،،،
مين إللي قتلك يا بطل
ومين إللي وضعك في التراب
مين إللى خلا لنا القدر
يحكم علينا بالعذاب
وقال على القدس الشريف
إنه خلاص أصبح خراب
ونسي،،، إن اﻷرض لما بترتوي
بدم الشهيد ترجع شباب
لكن شبابها مش لنا
من يوم ما مات ناجي العلي
،،،،،،،،،،،،
دور عليه يا حنظلة
و إسأل عليه المقبرة
و شوف ديدانها إزاي كلت
جسد الشريف ناجي العلي
،،،،،،،،،،،
شوف الديدان إزاي رضت
تظلم صاحبنا في الوفاة
طب مش كفايه إن الشهيد
إخوانه ظلموه في الحياة
وسيلو دم الشهيد
لاجل ما يراضو الطغاة
يا حنظلة دور و شوف
وبص ف وشوش كل البشر 
يمكن تلاقي مابين ألوف
حد ف شبه ناجي العلي
،،،،،،،
دور عليه يا حنظلة
و إفتح عليه المقبرة
و فك عن جسده الكفن
هتلاقي جسده ما زال شريف
و عمره ما يصيبه العفن
حتى لو جسده أصبح تراب
هتلاقي في وسط التراب
حفنة من أرض الوطن
مكتوب عليها إسم الشهيد ناجي العلي

  • Blogger Comments
  • Facebook Comments

0 التعليقات:

إرسال تعليق

Item Reviewed: الشهيد ناجي العلي Rating: 5 Reviewed By: السيد خميس