loading...

الثلاثاء، 15 أغسطس، 2017

من أكون ؟




محمود سميح 
الأسم ؟ 
فلان ابن فلان الفلانى ..
--السن ؟ 
فوق العشرين
قبل التلاتين
أو عايش يعنى بقالى كتير
-- المهنه ؟!
مش فاضى
دلأنى بدور على شغل
شغال متمرط مشاوير
شغال م-الأخر تدوير
و السىء جدآ مع حالتى
إحباطى بمرض التفكير
و السايد جدآ فى ظروفى
أحساسى بخوفى ..
و عياطى عشان عاجز اكون
عكاز يسمحلى اسند أهلى
أو حتى اشيلهم بعدين
أو ادكن فى البيت قرشين
مش لازم فى البنك الأهلى
ولا شرط (B.m) توصلنى
و لا شرط التوست يفطرنى
يكفينى مخلل أو عيش
أو احس ان انا عايز اعيش
المهنه ان انا واحد عاطل
بيشوف الكوكب من شيش !
--طب عندك رغبه ؟!
بصراحه مفيش
أنا واحد من ضمن فئات
معدومى جميع الرغبات
أو جايز فعلا كان عندى
لكن فى الواقع مبقتش
-- طيب بتحب ؟
كان فيه بنوته بتعشقنى
بعديها كتير دخلوا حياتى
و اتسبت و سبت و علفاضى
دلأن الجيب دايمآ فاضى
و ظروف الماضى مخلتش
-- مش فاهم ردك / مش فارقه يكون عندك بيت ؟
انا كنت بقول زيك بردك
أنا ياما سجدت و صليت
انا ياما ف-كذا فجر دعيت
انا كنت بقول بردو ياريت
لكن بالوقت مفرقتش
--أشرحلى سيادتك عايش ليه ؟
أشرحلك ايه !!
أو أصلآ وقتك يسمحلك ؟!
طب عندك طاقه حتستقبل ؟!
حتعد مشاكلى و تسمعنى ؟!
حتسد فراغى اللى وجعنى ؟!
طب فرق السن اللى ما بينا ..
ف-النص لا يمكن يقطعنى ؟!
انا بس بمهد إكمنك
جايز لما اغضب تمنعنى !!
- أنا حسمعك منك / احكيلى سيادتك عايش ليه ؟
طب ممكن نعكسها شويا
انا اصلآ عايش على ايه
على حس الست اللى تمللى
وقت الفجريه بتدعيلى
على حس الحلم اللى بعيد
و بقول حيقرب و يجيلى
على حس ان انا لسه عنيد
زى اللى ملوش ضهر ف-جيلى
على حس الكام خمسه جنيه !
على حس قاموس الأحيه
على حس بواقى الرغبات
على حس جهاد الإحباط
على حس النوم بعد صلاتى
على حس الدعا بعد عياطى
على حس ان انا ح-اصبح حاجه
أو حمشى ب-فيزا و كارنيه
على حس ان الدنيا الواسعه
حتساع أحلامى المحدوده
على حس ان الظلم الطبقى
مش هو نهاية الحدوته
على حس ان انا حدفع كاش
مش حفضل اشكك ع-النوته
على حس اليوم اللى ح-يجى
و اعشق و اتجوز بنوته
على حس ان شهادتى لا يمكن
تتعلق دايمآ ع-الحيطه
على حس الحظ اللى يخلى
أمثالى يزيطو مع الزيطه
على حس الحج اللى تمللى
يضحكلى ف-وشى اما يشوفنى
على حس الشارع و الحاره
على حس الناس المحتاره
على حس الواد اللى بيسرح
و يبيع مناديل عند إشاره
على حس ان انا لسه فى دمى
حبة حريه مع مراره
على حس ان انا بطرد همى
مع كبتى الخارج ف-سجاره 

إرسال تعليق

رياضة

فنون

تكنولوجيا

 
copyright © 2014 جريدة إرادة شعب مصر | تصدر عن مؤسسة إرادة شعب مصر