loading...

الثلاثاء، 3 أكتوبر، 2017

أزمة ضمير


بقلم :إخلاص عبد المحسن
أزمة ضمير و اتسببت فيها النفوس
لما الطمع جالها و عماها اتلجمت
مالهاش لغات للتفاهم غير الفلوس
ما يهمهاش أطفال كتيره اتيتمت
ما يهمهاش غير تملا كرش و تملا جيب
و تنام و تصحى على الحرام مات الضمير
نسيوا ان فيه فوق في السما عادل رقيب
و الشر من كتره طمس معاني الخير
و القلب خاوي
و العقل حاوي
حتى الصخور من ظلمهم .. إتكلمت
نطقت و قالت إرجعوا عن ظلمكم
بعتوا الضمير بكام و مين اللي اشترى
مين اللي سالب عقلكم
راجعوا الحساب و شوفوا مين اللي افترى
خافوا يا ناس من ربكم
إصحوا و فوقوا و اسمعوا صوت الضمير
صداه ضعيف جاي من بعيد
حاولوا تهدوا صوت طمعكم و اسمعوه
يمكن يكون ميلاد جديد
لكل قلب و عقل مات
لكل روح طاوعت هواها
لكل نفس قادها شيطانها و سلمت له
خانها و عماها
أزمة ضمايركم دي لازم تنتهي
و تتمحي
علشان ما يبقى الكون عمار 
و الناس تعيش في سلام و خير
و يحيا الضمير

إرسال تعليق

رياضة

فنون

تكنولوجيا

 
copyright © 2014 جريدة إرادة شعب مصر | تصدر عن مؤسسة إرادة شعب مصر