Latest News
الخميس، 10 مايو 2018

،، حلم الموت ،،



الشاعر/ حسين الديب ،،

جاني....يمكن قبل الفجر بساعة و يمكن أكتر
و جايز بعد النوم بدقايق ،،
قولتله مالك ؟؟
رد عليا بصوت مخنوق ،،
قولتله شكلك كدة متضايق
قولي مالك ؟؟
قالي الروح صعدت للعالي و سكنت فوق ،،
قولتله روق.....بكره الدنيا أكيد هترووق
لكن أنا مش فاهم منك قصد كلامك
رد و قالي قلبك جامد ،،
قولت أكيد....و كنت في ضعفي بخبي دموعي
و قصاده بكابر و بعاند ،،
قولتله إحكي عن أحوالك
قالي أنا حالي زي سواد الليل الحالك ،،
قولتله مالك.....ياريت تحكيلي
قالي دايما إحمد ربك ...قول أنا حامد ،،
قولتله مالك ؟؟
قالي يابني في عز المحنة خليك صامد ،،
قولتله مالك ؟؟
قالي يابني جمد قلبك .....قول أنا جامد ،،
قولتله قولها
آه ياليالي حزنها يوصف قسوة ليلها ،،
قولتله قولها
قالي خلاص ...... إنسى كل حكاوي تضايق ،،
قولتله قولها و صوتي إنحاش
و دمعة عيني فرت مني .... قالي بلاش ،،
وقالي إوعى تخلي الحزن ف مرة يدوسك
قولتله قولها .... و صوتي خارج من غير صوت ،،
بصلي نظرة حزن شديدة
و عم الكون أحزان و سكوت ،،
قولتله قولها
قالي كله أكيد هيفارق ،،
قولتله قولها
قالها و دمعه مغطي عيونه
قالي أنا جايلك.....و صوته راح من تاني لسكوت ،،
قولتله قولها
قالي أنا جايلك بخبر موت ،،
  • Blogger Comments
  • Facebook Comments

0 التعليقات:

إرسال تعليق

Item Reviewed: ،، حلم الموت ،، Rating: 5 Reviewed By: السيد خميس